القاهرة: أحمد ضياء عثمان
طيب قبل ما تنزل تطوع… اقرأ ده كويس.
وكلامي هنا مش مبني على فراغ ومش كلام مرسل علشان أعمل شو واللذي منه انا كدا كدا مش محتاج الحمدلله
أنا بتكلم هنا بصفتي واحد مسبتش كيان ولا نشاط ولا مؤسسة ولا حتى كيان عابر إلا وكنت جزء منه.
اشتغلت… تعبت… صرفت… بذلت مجهود كبير جداً جداً
ومسكت بوزيشن جوه الجامعة وبره الجامعة تابع لوزارات تابع لمنظمات دولية وغيرهم وغيرهم لما استكفيت
وجاي أقولك يعني إيه تطوع بجد واقولك كلام محدش غيري هيقولهولك
التطوع مش استنزاف باسم الخبرة
التطوع يا عزيزي مش إنك تدخل مكان يفضل يستنزفك تحت شعار:
“تدريب – خبرة – مهارات – شهادات”
الكلام ده في أوقات كتير بيكون ستار للاستغلال
هتقولي استغلال إيه؟
أقولك:
استغلال طاقتك كشاب.
استغلال فلوسك.
استغلال حماسك.
استغلال إنك لسه جديد ومش فاهم يعني إيه شهادة مفيدة بجد.
استغلال جهلك بالفرق بين شهادة حقيقية تضيفلك… وورقة عليها شوية حبر ملهمش أي لازمة
وأنا قبل كده كتبت مقال طويل عريض عن وهم الشهادات… وهحط اللينك تاني في الكومنتات علشان تطلعو عليه
وكمان يستغلوك في الحشد الصوري والي بسمي تجارة البشر
تعالى ياعزيزي أديك أمثلة من قلب المطبخ
كيان بيجمع حشد شبابي علشان يحضروا مؤتمرات أو حفلات.
يوهمك إنك هتاخد شهادة ووجبة هاا ركزلي علي الوجبة
يغريك بالأكل يعني وشوية وورق ملوش لازمة
فا تيجي تسأل نفسك ياعزيزي:
الشهادة دي هتنفعني في إيه؟
هيتكتب فيها إيه؟
“كان بيحضر مؤتمر”؟
طيب تعالا نبص بقى خلف الكواليس كده
هو جابكم كمالة عدد
شو إعلامي من الاخر
صورة حلوة
حشد صوري
والكيان قبض الثمن خلاص خد حق كل راس جت المؤتمر
وأقسم بالله التخطيط ده حصل قدامي قبل كدا
واتعرض عليّا أشارك فيه.
وقالي بالحرف:
“هتاخد على الـ100 رأس مثلاً 10,000 جنيه”.
تحس نفسك تاجر مواشي مش بتتعامل مع بني آدمين
نيجي بقي لماراثون زايد والعدد أهم من الإنسان
كنت في ماراثون زايد.
لا اللي فات… اللي قبله.
اتحاد تنظيم كيانات الشبابية الي ملوش أي لازمة حقيقية جمع الشباب ولبسهم تيشيرتات وقالهم هتشاركوا في الماراثون.
المفروض نستلم أرقام السباق طيب فين
طلعنا مش مسجلين أصلاً
كل ده علشان نزود العدد والشكل الجمالي قدام الوزير والكاميرات.
العاصمة ف عز الشتا و الجو رصاص.
واحنا بنص كم وشورت علشان الجري.
وفي الآخر ولا مشاركة حقيقية ولا تقدير واهانه واخر قرف
كلو كوم وقصه كيان ما والموز في عز التلج كوم
كيان كان دوره مرصوص على طول طريق 10 كم.
شباب واقفين في عز التلج يوزعوا ميه وموز
ويصورو أجباري
واتقالهم: هتاخدوا شهادة.
طيب لما تروح تقدمها لجهة شغل
هتقولهم كنت بوزع موز مثلا؟
والأرشيف موجود والله ومخزن أنا عندي صور وعندي سكرينات توعندي توثيق لكل كلمة بقولها.
بس خليني أسيب ده على جنب دلوقتي
وأقولك النصيحة فعلاً من
“واحد كان جوه المنظومة… وشاف الحلو والوحش”.
نصايح بجد مش هقولك خااص شعارات وشو وقرف
وانت بتختار الكيان اختار كيان واضح رسمي صريح ليه أثر حقيقي على الأرض
بلاش تستهلك نفسك في مبادرات وحملات فارغة مش هتضيفلك حاجة.
ابعد تمامًا عن الكيانات الوهمية غير الرسمية.
تعليمك أولاً غصب عن أي حد متقصرش في حق تعليمك.
مهما حصل شهادتك الحقيقية هي اللي هتحدد مكانتك بعد كده.
مش شهادة حضور مؤتمر ولا غيرة
كل ساعة تقضيها في تأهيل نفسك
أحسن مليون مرة من تطوع مش بيضيفلك حاجة
ياعزيزي تعالا اسعدك تتعلم:
لغات
كمبيوتر
مهارات حقيقية
تخصص تتقنه
وبقولكم كده ليه تفتكرو
لأني ضيعت وقت كتير جدًا واتهد حيلي حرفيا
واستنزفت طاقتي وشغفي.
وفي الآخر؟
اللي اتمكن هو اللي أهل نفسه بجد وانت محلك سر
حتى لو معملش عمل خدمي خالص نجح بردو
النجاح ياعزيزي مش مجرد شعارات وخلاص
اشتغل شغل يجيبلك دخل
ادرس علم واتعمق فيه.
اشتغل على عقلك وفكرك صح
العمل العام لازم تكون داخل عليه وانت ناجح فعلاً.
مش واحد عايش على شعارات:
“عاش الملك… مات الملك”
وخلي بالك علشان البيئة الملوثة الي هتكون فيها هتتعبك
حافظ على الحتة النضيفة اللي جواك.
متخليش المصالح تنسيك الحلال من الحرام
وهتدخل بيئة… مليانة:
حقد
نفاق
غل
استغلال غ خد بالك كويس جداً
ومهم جداً جداً جداً مفيش حد اسمه “زي بابا” ولا “زي أخويا”.
المسؤولين دول — إلا من رحم ربي وهم قلة نادرة —
ممكن يستخدموك علشان يدعموا مصالحهم الشخصية.
وبعد ما يخلص دورك؟
“شكرًا على خدماتك”
ولو معملتش حاجة تحفر بيها اسمك بجد
هتتنسي عادي.
وييجي غيرك في ثواني.
الاستبدال سهل جدًا.
المنظومة دي ناس كتير فيها بتطلع على أكتاف ناس تانية
و تحذير مهم جداً جداً للبنات
والبنات تحديدًا… احذروا مليون مرة.
في مسؤولين بيستخدموا مناصبهم اللي ملهاش لازمة في كيانات وهمية
علشان يدخلوا في علاقات نسائيه واستغلال الفتيات
واللي اتكشف منهم كتير
ومعايا سكرينات كمان بكل حاجه
بيئة مش دايمًا نظيفة للاسف
الخلاصة ياعزيزي
وفر فلوسك.
وفر وقتك.
واستثمرهم في نفسك صح
نجاحك الحقيقي أهم من صورة مع لوجو ولا مع مسؤول
وأهم من شهادة حضور وأهم من تيشيرت عليه اسم كيان
التطوع الحقيقي الي بجد رسالة
لكن لما يتحول لتجارة بالبشر واستغلال ليهم
يبقى لازم نقف ونسأل نفسنا هل احنا بنستفاد
وكمان هنزل في الكومنتات الجروبات بتاعتي
والأماكن اللي تستحق فعلًا تطوع وتشارك فيها
وطريقة التقديم وكل حاجة
سيب كومنت علشان ترجع للبوست.
هحدث الكومنتات باستمرار بصور ولينكات وسكرينات. لحاجات كتير جدا
اعمل متابعة وحط لايك واعمل منشن لصحابك علشان يتابعو معانا
